Tetikesan Masatua

Satua
Kasusastraan Bali Purwa ring kepahannyané wantah jimbar pisan, silih sinunggilnyané sané marupa satua. Wangun satua punika wantah marupa gancaran, yéning anutang ring kepahan  kasusastraan Bali, satua punika ngranjing pinaka kasusastraan sané katuturang utawi ketah kabaos sastra lisan, sané wangunnyané gancaran utawi prosa. Satua taler kabaos folklore, inggih punika  kasusastraan sané marupa gancaran, sané nyaritayang indik pula-pali kahuripan i manusa utawi beburon sané mawit saking kabudayaan ring dija satua punika kacaritayang utawi local genius.
               Satua manut James Dananjaya (1997:2) wantah budaya saking pakraman sané katamiang miwah  katedunang ngantos ka pianak cucunyané. Satuané puniki nénten ja wantah katami antuk katuturang kémanten sakéwanten madaging wiraga (gerak) utawi alat pembantu mengingat. Satua-satua sané katami ring Bali saking nguni sinamian nyihnayang indik kebudayaan Bali.  Yadiastun marupa kasusastraan sané katuturang, sakéwanten wénten taler satua-satua ring Bali sané kasurat ring lontar. Panglimbak jaman miwah teknologi sané ngawinang satua mangkin sampun sayan becik kawéntentanan nyané. Akéh sampun satua-satua ring Bali sané kasurat miwah kamedalang dados buku. Wénten taler satua-satua Bali sané sampun ngranjing ring media elektronik sané kajangkepang ring game utawi fi lm ring TV.
Pinaka utsaha nglimbakang satua Bali akéh sampun pamargi sané kamargiang olih pamréntah pinaka sang angawa rat. Silih tunggilnyané ngamargiang lomba masatua Bali sané ngranjing ring tingkat sekolah dasar. Sajeroning pendidikan formal, satua punika sampun ngranjing ring buku pelajahan saking SD ngantos SMA. Satua Baliné puniki becik pisan, santukan akéh madaging piteket-piteket sané mabuat ri sajeroning kahuripan. Yéning kadi baos mangkin, satua puniki kaya nilai moral sané patut kauningin ring alit-alité sami.


Cecirén Satua
             Satua pinaka silih tunggil kasusastraan madué cecirén sané minayang satua ring kasusastraan sané tiosan.  Wénten makudang-kudang cecirén satua, inggih punika:
a. Wénten bebaosan (dialog) pantaraning tukang satua sareng sané mirengang satua. Bebaosan punika ketahnyané mamargi ring pangawit pamargin satua saking tukang satua sané nyatuayang, tur sering taler kawawanin mawali ring tengah – tengah satua, sakadi : Tukang satua : Ada koné tutur – tuturan satua, I Buta tekén I Bongol. “Maan dong kéto”!. Sang sané mirengang :“ Maan”.
b. Ketahnyané ri sajeroning pangawit satua punika, wénten wangun lengkara sané masuara : ”Ada koné tutur-tuturan satua”. Ri sajeroning wangun lengkara punika wénten kakalih sané katlatarang, inggih punika kruna “koné” miwah kruna “ tutur-tuturan“ utawi “orah-orahan“. Indik kruna “koné” puniki akéh kawawanin ri tatkala tukang satua nyatuayang satuannyané, indiké punika riantukan satua punika nénten pinaka reriptan saking sang nyatua, sakémaon sampun kapirengan saking anak tiosan, dadosnyané marupa tetamian turun-tumurun. Salanturnya kruna “ tutur-tuturan “ utawi “ orah-orahan “ , punika mawit saking morfem “ tutur “ lan “ orah “ . Kruna ” tutur ” punika maduwé artos
” nuturang ” utawi mareraosan. Kruna ” tutur–tuturan ” taler kruna ”tuturan” ring sajeroning istilah téknis satua maduwé artos cerita lisan. Asapunika kruna ”orah-orahan” wantah mawit saking kruna lingga ”orah” sané martos ”nguningayang”. Tur kruna turunannyané sakadi punika ring ajeng, taler martos ” cerita lisan ” .
c. Cecirén sané kaping tiga wénten kruna ”lantas” utawi ”laut” , sané taler terus kawawanin rikala masatua.
d. Satua sané wénten ring Bali akéhan sané nénten kauningin sira sané ngawi utawi ngripta satuané punika (anonim).
e. Satua madué makudang-kudang versi sané mabinayan manut ring genah satua punika katuturang. Sekadi conto satua I Belog, satua puniki madué makudang-kudang versi sakéwanten tokoh sané kacaritayang wantah asiki.
           Tiosan ring cecirén, satua taler madué unsur intrinsik. Unsur intrinsik ring satua Bali pateh sekadi unsur intrinsik ring kasusastraan gancaran sané tioasan sekadi cerpén, novel, miwah drama.
Unsur intrinsik ring satua inggih punika:
a.  Unteng pikayun (tema)
b.  Lelintihan satua (alur)
c.  Tokoh miwah penokohan
d.  Latar satua:
• Latar genah (tempat)
• Latar gelah (waktu)
• Latar kahanan (situasi sosial)
e.  Tetuwek (amanat)
f.  Sudut Pandang



Tetikes Masatua
             Rikala jagi masatua, nénten ja wénten tetikes sané banget méweh. Sané pinih utama wantah uning ring lelampahan satua miwah prasida nyikiang pikayunan ring sané mirengang satua. Sakéwanten, yéning jagi nyarengin lomba masatua matiosan malih tetikes sané patut uratiang.
           Tetikes masatua mangda satua sané kabaktayang prasida mamargi becik miwah nudut kayun sang sané mirengang.
1. Wirama inggih punika vocal/intonasi suara sané prasida nudut kayun sang sané
mirengang
2. Wirasa inggih punika kawagedan maktayang satua antuk rasa mangda nenten sekadi anak ngapalang.
3. Wiraga inggih punika semita utawi laras sang sane maktayang satua