Laporan Mabasa Bali

Om Swastyastu ida dane sareng sami sane kusumayang titiang.
Ring galah sané becik sekadi mangkin titiang jagi nyobiahang indik laporan mabasa Bali.
Nenten malih titiang mabaos kangin kauh.
Rarisang cingak ring sor puniki.



Laporan inggih punika wangun bebaosan lisan utawi tulis ngenénin sekancan pariindik pinaka sarana informasi utawi pertanggung jawaban saha mutusang sahananing wicara sané sampun kamargiang sajeroning organisasi. Laporan mawiguna kaanggén nelatarang sahananing  pangerencana parilaksana miwah hasil sané kakapikolihang ring sajeroning pekaryan sané sampun  kalaksanayang.


Wangun laporan
Wangun laporan wénten makudang-kudang soroh sakadi:
1. Laporan mawangun formulir/utawi matrik, inggih punika laporan sané sampun maduwé
blangko. Sang sané nyurat laporan punika wantah nagingin blangkoné kémanten.
2. Laporan mawangun mémorandum utawi nota, inggih punika laporan sané daging ipun
cendek utawi bawak. Laporan puniki sering kaanggén antuk pejabat ring para karyawané  kémanten.
3. Laporan mawangun surat inggih punika laporan sané katlatarang sakadi surat, tur dagingnyané dados ngunggahang sekancaning pariindik.
4. Laporan mawangun naskah inggih punika laporan sané sakadi makalah, daging ipun kepah
dados topik miwah sub topik.
5. Laporan mewangun buku inggih punika laporan sané kasusun sakadi buku.


Tata Cara Nyurat Laporan
1. Pangrencana laporan
• Napi sane jagi kalaporang
• Napi mawinan patut kalaporang
• Malih pidan jagi kalaporang
• Indik napi sane jagi kalaporang
Yening sampun sida nyawis pitakene puniki pacang prasida maosang indik latar belakang,
pikobet, tetujon laporan.
2. Mupulang sapariindik (mengumpulkan bahan)
3. Sistematika utawi nudonang daging laporan
4. Nyurat laporan


Imba Laporan Ketua Panitia Wanti Warsa Banjar Nyamping
Om Swastyastu
Sané kusumayang titiang bapak kelihan Adat banjar Nyamping,
Ida, Dané krama sami  sané wangiang titiang,
Para truna-truni sané tresna sihin titiang
Ring rahina sané becik puniki ngiring sareng sami ngaturang pangrastiti ring Ida Sang Hyang Widhi Wasa, santukan wantah sangkaning pasuécan Ida, iraga sareng sami prasida masadu ajeng iriki jagi maosang indik parikrama pamargin wanti warsa banjar Nyamping tahun 2017 sané sampun kamargiang.
Titiang sané kasudi pinaka ketua panitia, ring rahinané puniki, lugrayang titiang nlatarang indik pamargin acarané puniki .
1. Ngawit rahina radité tanggal 17 Agustus 2017 jagi kawéntenang acara mareresik ring balé banjar
nyantos sawewengkon désa Tan Janten.
2. Ring rahina soma selanturnyané pacang kawéntenang lomba widang olahraga miwah permainan sané ngalédangin kayun
3. Ring rahina anggara, kawéntenang lomba mekarya sanganan tradisional mangda truna truniné sami kréatif.
4. Ring rahinané mangkin ring pajantosan wantiwarsané kawentenang malam kesenian.
     Indik prabéa sané kaanggén ngremba acara puniki mawit saking jinah kas sekaa truna truni kawewehin antuk kauntungan kupon basar sané sampun kamargiang.


        Wantah asapunika prasida uningayang titiang indik pamargin wanti warsa sekaa truna truni desa Gunaksa sané kaping selikur.
Om Santhi,Santhi, Santhi Om
                      Semarapura, 17 Agustus 2017
                     Ketua Panitia Sekaa Truna                                       Truni Br. Nyamping
 

                  I Komang Agus Deddy Pradnyana

           Wantah asapunika prasida tiatiang aturang. Kaping ungkur puputang titiang antuk parama santih.
Om santih, santih, santih om