Om Swastyastu, Ampura Ida Dane sane banget kusumayang titiang, nenten wenten manah jagi nasikin segara. Icen titiang akidik imba cecangkitan (paribasa). Cecangkriman silih sinunggil pah-pahan sajeroning paribasa, sane sampun lumbrah kaaangen magegonjakan miwah makedekan ritatkala mabebaosan. Galah sane becik sekadi mangkin tiang jagi ngicenin imba cecangkriman sane lumrah tetujonnyane mangda prasida kawacen. Rarisang cingakan ring sor.
- Bapa Pucung, umah bapa di alas agung, bengkuk pengadege, awake mabulu pipis, pawah cakluk, layahe selep-selepang. pasautnyane: klesih (trenggiliing)
- Dratdat-drutdut, bingah-binguh liwat inguh, nyumbil sisin pagehan, padidi sing dadi ngranjing, nene catur, nyamane suba di tengah. pasautnyane: anak nginang (orang makan sirih)
- Jalan buntu, tan masepak nolor terus, nyen makeneh mentas, apang elahan agigis, musti blenggu, majalan ditu magaang. pasautnyane: anak menek punyan nyuh (orang memanjat kelapa)
- Berag landung, ngelah panak cenik liu, memene slelegang, panakne jekjek enjekin, menek tuun, mememne gelut gisiang. pasautnyane: anak menek jan (orang naik tangga)
- Kaki Pucung, awak bunter maretungtung, basange anginan, asing paek ye ninjakin, uber kepung, I Kaki incang-incangan. Pasautnyane: anak maen sepak bola (socer)
- Nyerukukut, majempong ya biana senggu, masiksik dong naga, matapuk ya boya manggis, tur macunguh, nanging tusing bisa ngungas. pasautnyane: buah manas (buah nanas)
- Baong pucung, ejit tengging purus tirus, capile maogarang, asing nyekuk kajengitin, cening bagus, banggi makucar-kaciran. Pasautnyane: anak nginem yeh nganggen caratan (minum air dengan caratan)
- Dini ditu, bikase sai katepuk, manyama ya patpat, dikalane ingkup nunggil, dadi pesu, gunannyane ngawe ilang. Pasautnyane: anak masigsig (orang makan sirih)
- Jumu bungut, duur bungut gidat jantuk, ejit lan baonge, malih bibih muah ejit, lambe narung, silit maka dados puncak. pasautnyane: anak nyalukin barong landung
- Bapa pucung, indeng-indeng di alas agung, panake koryak-koryak, di kayune ye padingkrik, basang pelung, tendase majejambulan. Pasaut: ......................
- Meme ayu, makamen sitsit a kencrung, ada manyeropen, ada ngemang nyilih, jani payu, mangigel ejitne ngenah. Pasautne: ............... (alat yang dipakai melilit benang saat menenun)
- Ia majujuk, katumbak enu majujuk, ane numbak ebah, laut ngandang ngulintik, bes kadurus, pangencele mametelang. Pasaut: banggul
- Bintang along, kapaid lalipi laut, katututin pandan, enyen taen manepukin, buka bau, ceningke ajak makejang. Pasautnyane: bintang laut
- Bapa Ketut, matapa di kayu lusuh, wilis parupana, uling cerik kayang mangkin, tekek ngelut tera keles-keles magisiang. Suba puput, matapa di taro lusuh, masalin sapisan, tundun barak basang putih, tan paulu, ikud jamprah lagut samah. Pasaut: buah biu (pisang)
Wantah amunika dumun sane prasida aturang titiang.
Ngiring sareng-sareng malajah mangda basa bali ida dane sareng sami ngancan nglimbak.
Puputang titiang antuk parama santih.
Om santih, santih, santih om
Tidak ada komentar:
Posting Komentar