Ugrawakya Widyatula

 

Om swastyastu ida dane sareng sami, mogi sami kenak saha rahayu. Ring galah becik sakadi mangkin titiang ngaturang imba ugrawakya widyatula. Naskah ugrawakya puniki karemba sareng Kadek Fitriani, Komang Agus Dedy Pradnyana sane waged indik anggah ungguhing Basa Bali. Nenten wenten manah jagi nasikin segara, dumogi naskah ugrawakya puniki wenten pikenohnyane.

Durusang cingak imba ugrawakya ring sor puniki

Pembukaan (Pamungkah)

Inggih titiang nunas uratian majeng ring Ida Dane sareng sami, riantukan sampun rauh kadi panumaya galah, parikrama pamungkah widyatula bulan bahasa bali ring rahina mangkin, Buda Paing, Wuku Landep, pinanggal dasa Pebruari warsa kalih tali selikur (10-02-2021) , jagi kawitin titiang.

Om Swastyastu.

Om Anobadrah Kertawyantu wiswantah

(mogi pikayunan sane susrusa rauh saking sakancan genah)

Kaping ajeng mantuka Bapak Kepala SMA Negeri 1 Semarapura sane kusumayang titiang,

Uleman Narawakya widyatula bulan bahasa bali sane dahat wangiang titiang,

Bapak/Ibu Wakil kepala SMA Negeri 1 Semarapura sane wangiang titiang,

Bapak/Ibu guru prawartaka bulan bahasa bali SMA Negeri 1 Semarapura sane wangiang titiang,

Asapunika taler para OSIS lan para sisia sane ngangganin Kelas X lan XI SMA Negeri 1 Semarapura sane tresna sihin titiang.

Malarapan antuk manah gargita, titiang ngaturang parama suksmaning manah majeng ring Ida Sang Hyang Widhi Wasa, riantukan sangkaning asung kerta wara nugraha Ida, titiang, asapunika taler Ida dane sareng sami prasida mapupul ring galahe sane becik puniki, sajeroning parikrama bulan bahasa bali warsa kalih tali selikur (2021) SMA Negeri 1 Semarapura sane ngambil Tema “ Wana Kerthi – Sabdaning Taru Mahottama” Bulan Bahasa Bali sebagai Altar Pemuliaan Bahasa, Aksara dan Sastra Bali tertaut Jelajah Pemaknaan Hutan sebagai Prana Kehidupan.

Mungguing dudonan parikrama sane pacang kalaksanayang ring rahina mangkin, inggih punika :

Pamungkah

Sambrama Wacana saking Bapak Kepala SMA Negeri 1 Semarapura

Widyatula

Pabligbagan/Tanya jawab

Masandekan

Pamuput

Inggih Ida dane sane wangiang titiang, kalanturang ring parikrama selanturnyane nembangang lagu Indonesia Raya.

Majeng ring ida dane sareng sami durusang ngadeg.

Majeng ring sang sane kajudi durusang

Inggih Ida dane sareng sami, titiang nunas mangda stata ngadeg. parikrama selanturnyane inggih punika nguncarang “doa”

Majeng ring sang sane kajudi durusang

(Inggih Ida dane sareng sami, durusang malinggih )

Kalanturang antuk parikrama kaping kalih, sambrama wacana saking Bapak Kepala SMA Negeri 1 Semarapura, turmaning mungkah parikrama widyatula bulan bahasa bali warsa kalih tali selikur (2021) ring rahina sane mangkin. 

Majeng ring Bapak Kepala Sekolah durusang, galah katur

(Suksma majeng ring Bapak Kepala Sekolah)

NB : Majeng ring ida dane sareng sami, durus ngunggahang sanganan sane sampun kasayagayang.

Acara Inti

Inggih Ida Dane sareng sami, parikrama bulan bahasa bali warsa kalih tali selikur (2021) ngunggahan tema “ Wana Kerthi – Sabdaning Taru Mahottama”. Tema puniki pinaka panglimbak Visi Pemerintah Provinsi Bali Nangun Sat Kerthi Loka Bali Melalui Pola Pembangunan Semesta Berencana Menuju Bali Era Baru. Visi punika mateges “ngraksa kasucian miwah paiguman palemahan bali taler makasami dagingnyane, anggen nyinahang kawentenan kahuripan Krama Baline sane gemah ripah miwah bagia, sekala niskala nyujur kahuripan krama miwah jagat baline. Pamargin bulan bahasa bali pinaka sarana nglimbakang daging pergub bali nomor 80 tahun 2018 tentang perlindungan dan penggunaan Bahasa, Aksara, dan Sastra Bali serta penyelenggaraan bulan bahasa bali.

Inggih Ida Dane sareng sami, ring galahe sane becik sekadi mangkin, titiang, taler para prawartaka bulan bahasa bali SMA negeri 1 Semarapura prasida ngrauhang Bapak narawakya, Inggihan punika Bapak Ida Bagus Pawanasuta, S.Pd., M.Pd.

Bapak Ida Bagus pawanasuta puniki embas ring gianyar, pinanggal 21 (selikur) Nopember warsa 1966 (siu sanga atus enem dasa enem). Ida nyurat sajeroning basa bali miwah Indonesia minakadi puisi, gancaran miwah artikel. Lianan tekening sastrawan, ida taler pinaka guru pengajian. Rariptan Ida akeh kaunggahang ring bali post miwah piranti cetak sane lianan. Bukunida sane sampun medal, sekadi  Berguru pada Giri warsa kalih tali sia (2009), miwah Guwungan warsa kalih tali dasa (2010). Ida pinaka sang sane ngwangun sanggar tutur lan komunitas sastra lentera.

Inggih majeng ring bapak Ida Bagus pawanasuta, durus nagingin parikrama  widyatula rahinane mangkin. 

Galah susrehang titiang.

(seminarrrrrrrrr)

Inggih ida dane sane wangiang titiang, asapunika iwawu bebaosan saking bapak narawakya sane sampun piarsayang sareng sami. Sane mangkin titiang mungkah pabligbagan utawi sesi tanya jawab. Sesi kapertama titiang kawitin antuk tigang pitaken

(interaksi)

Inggih majeng ring pamilet widyatula sareng sami, sapasira sane jagi kayun mataken, durusang unggahang tangannyane……

Inggih wawu asiki pitaken, minabta wenten malih sane jagi mataken durusang unggahang tangannyane

Inggih wawu kalih pitaken, sapasira malih jagi kayun mataken durusang

Inggih minabta nenten wenten malih sane jagi mataken, iriki sampun wenten kalih/tiga pitaken. Majeng ring bapak narawakya sane dahat wangiang titiang, durus nampenin pitaken saking pamilet I wawu. Galah susrehang titiang

Inggih ida dane sareng sami, asapunika I wawu penampen saking bapak narawakya, minabta wenten malih sane jagi mataken utawi durung tatas durusang malih mapitaken

Inggih duaning nenten wenten sane mapitaken malih, rumasa gargita pisan bpk Ida Bagus Pawanasuta sampun prasida rauh ring genahe iriki mangda iraga sareng sami prasida nelebang malih kaweruhan indik lontar usada taru pramana sane mabuat pisan ngeninin indik ngupapira entik-entikan lan nyaga alas gunung iraga sareng sami.

Inggih Ida dane sareng sami, sane mangkin sampun panumaya galah masandekan, durusang majeng ring prawartaka mangda ngicen boga samatra sane sampun kasagayang .

 

Penutup (Pamuput)

Inggih wantah asapunika dudonan parikrama sane sampun kalaksanayang. Titiang pinaka ugrawakia muput parikrama widyatula bulan bahasa bali warsa kalih tali selikur  (2021) SMA Negeri 1 Semarapura ring rahinane mangkin. Yening wenten atur titiang sane nenten manut ring arsa ida dane, titiang nunas geng rena sinampura, maka panguntat atur, puputang titiang antuk paramasantih

Om Shanti Santhi Santhi Om.