OM Swastyastu majeng Ida Dané sané banget wangiang titiang.
Ring galah sané becik puniki titiang jagi ngicen imba indik wacana sané nganggén basa kepara miwah basa alus.
*Wacana nganggén basa kepara*
Ia jani lakar tangkil ka pura, sawiréh jani nemonin rahina kadasa tuah piodalan Batara turun kabéh di Pura Besakih. Ia ngoraang lakar makemit di pura, koné ditu di pura prasida lakar nemuang kadegdegan keneh. Panganggén ané anggona ka pura ento tuah, baju putih, udeng putih, saput putih miwah kamen putih. Apa krana keto, sawiréh warna putih ento nyihnayang kenehé suci ening nirmala, patuh tekén kasucian purané sawiréh ane malingga di pura Ida Sang Maha Suci. Petengné ia milu ngayah magegitan utawi magita shanti tujuanné apang sida nemuang kadegdegan, kasentosan miwah kalanduhan keneh.
*Wacana nganggén basa alus*
Dané mangkin jagi tangkil ka pura. Riantukan mangkin nemonin rahina purnama kadasa wantah piodalan Batara turun kabéh ring pura besakih. Dané maosang jagi makemit ring pura, minab irika ring pura prasida pacang ngamolihang kadegdegan manah. Panganggo sané anggéna ka pura punika wantah kwaca putih, déstar putih, kampuh putih miwah wastra putih. Napi sané ngawinang asapunika, ri antukan warna putih punika nyihnayang manahé suci ening nirmala, patéh tekéning kasucian purané ri antukan sané malingga ring pura Ida Sang Hyang Maha Suci. Wenginé dané nyarengin ngayah magegitan utawi magita santi tetujonnyané mangda sida ngamolihang kadegdegan, kasentosan miwah kalanduhan manah.
Wantah asapunika prasida titiang ngicén indik wacana sané nganggén basa kepara miwah alus, manawita wenten sané kirang, indayang tegepin malih mangda nemu sané kabaos wacana paripurna.
Puputang titiang antuk parama santih
Om santih, santih, santih om
Tidak ada komentar:
Posting Komentar