Lengkara inggih punika pupulaning kruna sané manut lintihan, sané mamuat teges inggihan wénten wirasanipun. . Lengkara sané jangkep ketah kawangun antuk (1) jejering lengkara (subjek), (2) linging lengkara (predikat), (3) panandang lengkara, (objek) (4) pidartaning lengkara (keterangan). Nganutin parilaksanan jejering, lengkara kabinayang dados kalih (2) kadi ring sor:
1. Lengkara Lumaksana/ Kalimat Aktif
2. Lengkara Linaksana/ Kalimat Pasif
1. Lengkara Lumaksana (Aktif), lengkara sané jejering lengkaranyané nglaksana pakaryan, kasinahang saking lingingnyané. Sane nglaksanayang karya dados unteng bebaosan. Cecirén lengkara lumaksana sampun ketah linging lengkaranyané marupa :
a. Kruna kria lumaksana
Umpami : Luh Ayu luas ka peken.
b. Kruna tiron mapanganter (ma)
Umpami : Luh Ayu madagang di peken.
c. Kruna tiron maseseselan (um)
Umpami : Eda Luh Ayu Sumangsaya tekén beli
d. Kruna tiron mapangiring (ang)
Umpami : Luh Ayu, gaénang bapa kopi, sirah bapané puruh!
e. Kruna polah
Umpami : Luh Ayu nyampat di natahé
f. Kruna tiron maweweh gibung ma - an
Umpami : Eda ngawag matimpugan, nyanan ada anak lenan kena!
2. Lengkara Linaksana (pasif), lengkara sané jejering lengkaranyané keni pakaryan. Lengkara linaksana puniki kacihnayang antuk karya sane sampun puput kalaksanayang. Lengkara Linaksana kaciriang antuk linging lengkaranyané
a. Kruna kria linaksana
Umpami : bukuné suba aba tiang masuk
b. Kruna tiron mapanganter ka - ma
Umpami : suraté suba kakirim dibi sanja
c. Kruna tiron maseselan in-
Umpami : buku punika puput ka sinurat warsa 2017.
d. Kruna tiron mapangiring in, ang
Umpami : I Bapa luas negakin sepéda motor
I Bapa nyemakang biu aijas
e. Kruna tiron mawewehan gibung ka - an
Umpami : makejang tuturanga kajelékan timpalné
Tidak ada komentar:
Posting Komentar